فى المقطم اثناء تصوير مسلسل

فى البداية البوست اللى هكتبه النهاردة ده كنت كاتبه قبل كده فى مدونة بتاعتى فى احد المواقع و حبيت انقله هنا
ففى ناس البوست بالنسبة لها هيبقى مكرر .. البوست كنت كاتبه فى 11/5/2007

***

النهاردة كنت فى المقطم .. الساعة 10 تقريبا ..

كان فى تصوير مسلسل لخالد ذكى و نادية جندى .. المهم كنت واقف انا و 3 اصحابى و مكان التصوير فوق هضبة متوسطة الارتفاع .. يعنى شايفنهم و هما شايفنا من فوق و طبعا الانوار الجامدة ديه بتاعت التصوير و القلق ده ..

كانوا بيعملوا بروفا للتصوير .. المشهد اللى هيصوره ان نادية واقفة بعيد عن خالد ذكى بحاجة بسيطة كده و بيجرى عليها و يمسكها مسكة .......... اه اه مسكة تمثيل !!

المهم انا و و اصحابى شوفنا البروفا اعدنا نتريق و نضحك و شباب واقفين جنبنا تحت نفس الحكاية ..

و هما بدأ يصوروا كل لما يجيى خالد ذكى يمسكها أعلى صوتى و اديهم ضهرى و اقول : حرااااااااااااام استغفر الله العظيم يارب انت شايفهم !!!

طبعا المخرج يقول استووووووووب زى ما بنشوف فى الافلام كده نعيد الشوت يا جماعة و بتاع ..

تانى اعادة للمشهد عملت نفس الحوار والله

المخرج زعأ و بتاع يا شباب مينفعش كده عاوزين نشتغل .. فى المرة التالتة عملت نفس الحركة و اول ما يمسكها اقول نفس الجملة

الاستاذ خالد ذكى كلمنا بزوق يا شباب انا اَسف ياريت شوية بعيد عشان نصور ( طبعا بنقطع عليه و مش عارف يمثل الراجل

طبعا طنط نادية فى كل مرة اقول الجملة بتاعتى و انا واقف تحت تعد تضحك بصوت عالى

المهم قولت له ماشى يا استاذ خالد يلا يا شباب نطلع و نقف فوق عند مكان التصوير و كفاية رخامة عالراجل خليه يعرف يمسك !!! اقصد يمثـــــــــــل

بس طلعنا فوق كانوا خدوا الشوت و بيتفرجوا على الاعادة و الشباب واقفين ورا خالد و هوه قاعد و بيتفرجوا و طنط نادية بتجهز للشوت اللى بعده !! ( بتتعب والله الناس ديه يا جدعان )

بس بقول لواحد صاحبى احنا فى المقطم يعنى الناس ديه هتخلص وتشرب !!

اعد يضحك و شباب سامعين الحوار اعدوا يضحكوا جامد فا خالد بيبص ورا لاقنى .. قالى انت تانى مش انت اللى كنت عامل ازعاج تحت

قولت له معلش و بتاع .. ممكن صورة اوى اوى يا حبيبى ( جملة كل مشهور ) و اتصورت معاه شكرا يا استاذ خالد ..

اى خدمة يا حبيبى بس بلاش ازعاج فى الشوت .. ( الراجل بيحب التركيز فى الشغل اللى فى ايده يا جدعان )