Friday, October 26, 2007

موقف حصلنا فى كمين شرطة فى الميرغنى !

مش عارف انا ايه حظى مع رتبة الملازم الاول ( بنجمتين ) برده فى العيد حصل لى موقف مع ملازم اول فى صلاح سالم biggrin.gif

ما علينا احكى لكم الموقف الاول ..

ماشيين النهاردة انا و اصحابى فى الميرغنى بالعربية حوالى الساعة 1.30 بليل كده لاقينا كمين فى وشنا عادى صاحبى معاه ورقه كله تمام التمام

الطريق كان واقف شوية لان الكمين فاتح حارة واحدة بس يعنى بيعدى عربية عربية واحدة واحدة كان اودامنا عربيتين تقريبا

مسكت موبيل صاحبى موصلينه بسوكيت ( كبل يعنى ) بكاسيت العربية عشان الصوت يبقى اعلى و انضف على السماعات بدل الموبيل ..

و شغلت سارينة الشرطة و عليت الموبيل و عليت الكاسيت و بقا الصوت ما شاء الله يعنى rolling.gif rolling.gif

شباب مصر طبعا اللى ما بيصدق جنازة يشبع فيها لطم عاشوا معانا فى المود و اعدوا يهيسوا امين شرطة فى الكمين بص لنا و بضحكة صفرة كده و بيشاور بايده كده اننا هنركن جنب الكمين ( بيقولنا من قبليها laugh.gif )

الواد ورقه معاه مش خايفين و مافيش ممنوعات فى العربية يعنى كله فى السليم داخلين بقلب جامد بس اتعبرها تريقة انى شغلت السرينة و بصوت عالى كمان ( كاسيت الواد بيونير و 4 سماعات و جى إم . مضخم صوت ) biggrin.gif

ما علينا دخلنا الكمين امين الشرطة و عبارته المشهورة : رخصك ph34r.gif .. و مكشم وشه كده و محسسنى انه لواء مش امين شرطة

المهم بص جوا العربية و هوه برا كده و قاله اركن لى على جنب 025.gif

نزلنا ايه يا ريس بندحرج التماسى فى ايه بس و كل سنة و انت طيب بقا النهاردةالخميس ملهاش لازمة الوقفة بقا الرخص و معاك

المهم صاحبى شارى العربية من واحد اصلا و لسة مغيرش رخصة العربية و حوار كده المهم الامين سأل على الورق برده الورق معاه ماشى بيه احتياطى ..

طلع له دوسيه ورق فيه بتاع 4 او 5 ورقات المهم و بدأ يفهمه كل ورقة بتاعة ايه و صاحبى بيشرح له انا نفسى توهت فى النص rolling.gif

بصوا القصة بقا .. عم صاحبى الاول اشترى العربية و صاحب العربية الاصلى عامله توكيل جميل كده و صاحبى لما اشتراها اكيد باسم ابوه يعنى عمه عمل توكيل لابوه و وراه الورق برضه و ابو صاحبى عامل توكيل لصاحبى عشان يسوق العربية عقبال ما يسجل رخصة العربية باسمه laugh.gif

توهتوا منى صح المهم لفة كده لان رخصة العربية بأسم المالك لسة و المفروض يروح يجدد و كده الامين وقف تنح لنا كده مش قادر امسك نفسى من الضحك laugh.gif

قولت له انا قولت لك مشينا من الاول هتصدع نفسك عالفاضى والله خد سجارة يا عمنا و سلام عليكم و عليكم السلام و خلصت قالى لا لا تعالوا للباشا biggrin.gif

الباشا بتاعه قولت بس كمين فى الميرغنى اكيد قلق هنروح لعقيد او عميد مش هيرحم بقا طلع الباشا ملازم اول ربنا يحميه biggrin.gif

ملازم اول قولنا كويس شاب كده و عادى المهم وراه الورق و بيشرح له الامين القصة تاه هوه كمان راح صاحبى شارح تانى و كل ما اسمعه و هوه بيشرح اتوه انا كمان و اضحك طبعا المهم هزرنا مع الملازم ده

اخر ما زهأ قالوا بقولك ايه يا ابنى خد ورق الجرايد بتاعك ده و امشى بس بلاش تلف هنا كتير النهاردة قلق و بتاع و سلام سلام biggrin.gif

تحية كبيرة لشرطة بلدنا الجدعان اوى 022.gif

Sunday, October 21, 2007

توفت الى رحمة الله والدة المدونة ريرى


لا حول ولا قوة الا بالله

توفت والدة المدونة ريرى صاحبة مدونة فضفضة على الماشى



- اللهم أغفر لها و ارحمها و اعفو عنها و أكرمها

- اللهم وسع مدخلها و ادخلها الجنة و غسلها بالثلج و الماء والبرد

- اللهم يمن كتاباه و هون حسابها و لين ترابها و ثبت أقدامها و ألهمها حسن الجواب

- اللهم طيب ثراها و اكرم مثواها واجعل الجنة مستقرها و مأواها

- اللهم نور مرقدها و عطر مشهدها و طيب مضجعها

- اللهم آنس وحشتها و ارحم غربتها و قها عذاب القبر و عذاب النار

- اللهم نقها من خطاياها كما ينقى الثوب الأبيض من الدنس

- اللهم فسح لها في قبرها و اجعله روضة من رياض الجنة و لا تجعله حفرة من حفر النار

- اللهم انقلها من ضيق اللحود و القبور إلى سعة الدور و القصور مع الذين أنعمت عليهم من الصديقين و الصالحين والشهداء

- اللهم اجعل لها من فوقها و من تحتها و من أمامها و من خلفها و عن يمينها و عن يسارها نورا من نورك يا نور السماوات و الأرض

- اللهم أبدلها دارا خيرا من دارها و أهلا خيرا من أهلها و أزواجا خيرا من أزواجها واسكنها فسيح جناتك في الدرجات العلي آمين

- اللهم إن كانت قد أحسنت فزد في إحسانها و إن كانت قد أساءت فتجاوز عن إساءتها

- يا أكرم من سئل و يا أوسع من جاد بالعطايا … خفف أحمالها و حط من أوزارها واجعلها في مقام من قام لك بالقرآن أناء الليل و أطراف النهار

- اللهم كن لها بعد الحبيب حبيبا و لدعاء من دعا لهاا سامعا و مجيبا و اجعل لها من فضلك و رحمتك و جنتك حظا و نصيبا

- اللهم من أحييته منا فأحييه على الإيمان و من توفيته منا فتوفه على الإسلام

- اللهم إنا نسألك توبة قبل الموت و راحة عند الموت و مغفرة بعد الموت

- اللهم اجعل لنا عملا يؤنسنا في قبرنا إذا أوحشنا المكان و لفظتنا الأوطان و فارقنا الأهل و الجيران

- اللهم هب لنا نفوسا مطمئنة تؤمن بلقائك و ترضى بقضائك تقنع بعطائك

- اللهم أغفر لحيينا و ميتنا و شاهدنا و غائبنا و صغيرينا و كبيرنا و جميع موتى المسلمين و المسلمات الذين شهدوا لك بالوحدانية و لنبيك بالرسالة و ماتوا على ذلك

- اللهم اجعل خير أعمالنا خواتيمها و اجعل خير أيامنا يوم لقائك

- سبحان ربك رب العزة عما يصفون و سلام على المرسلين و الحمد لله رب العالمين

- الفاتحة "و صلي الله على سيدنا محمد و على آله و صحبه و سلم"

اللهم آمين

اللهم تقبل

Saturday, June 30, 2007

حتى الشحاتة بقى فيها تمثيل !!



موقفين شوفتهم بعينا خلونى اضرب كف على كف !! huh.gif .. للدرجة ديه يا جماعة الناس بتمثل عشان تشحت dry.gif

موقف حصل فى بداية الترم ده .. كنت مرة فى الجامعة و كنت مروح فا اوقات بمشى لغاية مسجد النور عشان اركب حاجة متجهة ناحية المطار ..

المهم و انا ماشى على رصيف تجارة فا فى نفق العباسية ماشى لاقيت واحد ست كبيرة فلاحة معاها السبت بتاع الجبنة و الحاجات ديه و طبق بيض مكسور ( مش طبق كامل الذكية لا كام بيضة كده ) و مادة ايديها ..

انا كنت شوفت نفس الموقف فى مسلسل نفس الحركة سعاد نصر عملتها !! laugh.gif .. جيه فى بالى ان الست بتمثل زى الموقف اللى شوفته فى المسلسل والله biggrin.gif

المهم قولت اعدى الناحية التانية عشان اراقبها ههههههه و انا واقف لاقيت ان الست ولا بتعيط ولا الكلام ده و كله هجص × هجص ..

وكل لما حد يجيى يقرب ناحيتها تعيط قال ايه يعنى عشان طبق البيض dry.gif

طبعا مش مشكلة لما تضحى بكام بيضة فى الطبق ... ما هى هتلم ثمن 3 او 4 اطباق بقا

لا ذكية برده حسبتها صح 025.gif

ده كان اول موقف اشوفه ان واحدة بتمثل عشان تشحت .. dry.gif

الموقف التانى بقا ..

يوم خميس و انا راكب المترو عشان رايح اقابل اصحابى فى التحرير واحدة ركبت من رمسيس و شايلة طفل صغير على ايديها ...

و كانت بتقول بصوت عالى ملفت اوى : اقسم بالله العظيم ان الكلام اللى هقوله صدق و حسبى الله و نعم الوكيل لو بكدب و الكلام ده ..

ان بنتها عيانة و مش عارف بتتعالج ب 100 ج بعد الخصم فى مستشفى تبع الدولة حاجات من ديه يعنى ..

انا بصراحة طلبت معايا انزل مع الست ديه المحطة اللى هى نازلة فيها عشان اشوفها قصتها ..

لانى برده شكيت انها تمثيلية .. اه مع العلم انها قالت عندها 5 بنات و ابوهم متوفى و انها محافظة على بناتها الكبار و مش ممشياهم فى الحرام ( جميل كده صح )

المهم على حظى نزلت نفس المحطة اللى انا كنت هنزل فيها ( انور السادات ) بس فضلت وراها .. طلعت من سلم المفروض مطلعش منه بعيد يعنى لانى المفروض اطلع عالسلم اللى بيطلع على كنتاكى ..

المهم بعد ما طلعت لاقيت واد صغير هييييييييييه هييييييييييه ماما جت ماما جت !! blink.gif blink.gif .. على الست اللى كانت بتشحت ( هى قالت عندها 5 بنات واخدين بالكم ؟!! )

المهم دخلت يمين جنب سلم المترو لاقيت راجلين اعدين تحت شجرة راحت اعدت معاهم واحد بتاع ولاعات و التانى مناديل و سجاير و الحاجات ديه ..

بصيت كده يا ولاد ال ......... dry.gif

بقا ده اللى جوزك ميت و عندك 5 بنات بتجرى عليهم .. لا و عمالة تهزر مع واحد فيهم ( تقريبا هوه ده جوزها ) و تضحك و بتاع ..

وتحت كانت هتعيط و لميت اد كده dry.gif dry.gif

فعلا عماااااااااااااار يا مصر !!!

Saturday, June 23, 2007

فى المقطم اثناء تصوير مسلسل


فى البداية البوست اللى هكتبه النهاردة ده كنت كاتبه قبل كده فى مدونة بتاعتى فى احد المواقع و حبيت انقله هنا
ففى ناس البوست بالنسبة لها هيبقى مكرر .. البوست كنت كاتبه فى 11/5/2007


***

النهاردة كنت فى المقطم .. الساعة 10 تقريبا ..

كان فى تصوير مسلسل لخالد ذكى و نادية جندى .. المهم كنت واقف انا و 3 اصحابى و مكان التصوير فوق هضبة متوسطة الارتفاع .. يعنى شايفنهم و هما شايفنا من فوق و طبعا الانوار الجامدة ديه بتاعت التصوير و القلق ده ..

كانوا بيعملوا بروفا للتصوير .. المشهد اللى هيصوره ان نادية واقفة بعيد عن خالد ذكى بحاجة بسيطة كده و بيجرى عليها و يمسكها مسكة .......... اه اه مسكة تمثيل !! laugh.gif

المهم انا و و اصحابى شوفنا البروفا اعدنا نتريق و نضحك و شباب واقفين جنبنا تحت نفس الحكاية .. biggrin.gif

و هما بدأ يصوروا كل لما يجيى خالد ذكى يمسكها أعلى صوتى و اديهم ضهرى و اقول : حرااااااااااااام استغفر الله العظيم يارب انت شايفهم !!! laugh.gif

طبعا المخرج يقول استووووووووب زى ما بنشوف فى الافلام كده laugh.gif نعيد الشوت يا جماعة و بتاع ..

تانى اعادة للمشهد عملت نفس الحوار والله laugh.gif

المخرج زعأ و بتاع يا شباب مينفعش كده عاوزين نشتغل .. فى المرة التالتة عملت نفس الحركة و اول ما يمسكها اقول نفس الجملة laugh.gif laugh.gif

الاستاذ خالد ذكى كلمنا بزوق يا شباب انا اَسف ياريت شوية بعيد عشان نصور ( طبعا بنقطع عليه و مش عارف يمثل الراجل laugh.gif

طبعا طنط نادية فى كل مرة اقول الجملة بتاعتى و انا واقف تحت تعد تضحك بصوت عالى laugh.gif

المهم قولت له ماشى يا استاذ خالد يلا يا شباب نطلع و نقف فوق عند مكان التصوير و كفاية رخامة عالراجل خليه يعرف يمسك !!! اقصد يمثـــــــــــل rolling.gif

بس طلعنا فوق كانوا خدوا الشوت و بيتفرجوا على الاعادة و الشباب واقفين ورا خالد و هوه قاعد و بيتفرجوا و طنط نادية بتجهز للشوت اللى بعده !! biggrin.gif ( بتتعب والله الناس ديه يا جدعان laugh.gif )

بس بقول لواحد صاحبى احنا فى المقطم يعنى الناس ديه هتخلص وتشرب !! blink.gif laugh.giflaugh.gif

اعد يضحك و شباب سامعين الحوار اعدوا يضحكوا جامد فا خالد بيبص ورا لاقنى .. قالى انت تانى مش انت اللى كنت عامل ازعاج تحت biggrin.gif

قولت له معلش و بتاع .. ممكن صورة اوى اوى يا حبيبى ( جملة كل مشهور biggrin.gif ) و اتصورت معاه شكرا يا استاذ خالد ..

اى خدمة يا حبيبى بس بلاش ازعاج فى الشوت .. ( الراجل بيحب التركيز فى الشغل اللى فى ايده يا جدعان laugh.gif )

Friday, June 22, 2007

البقاء لله وحده


البقاء لله وحده .. توفى الى رحمة الله تعالى والد اختنا

catroz

ارجو قراءة الفاتحة و الدعاء له بالرحمة و الثبات عند السؤال

اللهم ارحم امواتنا و اموات المسلمين اجمعين ان شاء الله

Wednesday, June 20, 2007

تاريخ الكنــــج





محمد منير (وشهرته أحيانا منير) ( 10 أكتوبر 1954) مغنٍّ مصري يُعرف بموسيقاه التي يخلط فيها الجاز بالسلم الخماسي النوبي، وكلمات أغانيه العميقة، وأسلوب أدائه و مظهره الغير ملتزم بتقاليد الطرب والمطربين، ]وبخاصة شعره النامي المفلفل بفوضى وطريقة إمساكه [ميكروفون | بالميكروفون]] ووقوفه وحركاته العصبية الغريبة أثناء الغناء. ومنير أيضا ممثل ودفّاف.







الميلاد والنشأة
ولد باسم محمد منير أبا يزيد جبريل متولي في قرية الدر القديمة، النوبة، أسوان. تلقى منير تعليمه المبكر و قضى فترة الصبا في أسوان قبل أن يهاجر مع أسرته للعاصمة بعد غرق قرى النوبة تحت مياه بحيرة ناصر التي خلفها السد العالي، في أوائل السبعينيات. أحب ممارسة الغناء كهاوِ منذ الصغر وكان يغني لرفاقه في الجيش.







التعليم والرعاية

تخرج في قسم الفوتوغرافيا والسينما والتليفزيون من كلية الفنون التطبيقية بجامعة حلوان. وأثناء أو بعد دراسته استمع إليه زكي مراد الشيوعي النوبي فأوصى عبد الرحيم منصور، الشاعر المعروف آنذاك بالاستماع إليه، وكبرت الدائرة لتشمل أحمد منيب الذي لم يكن أحد قد سمع به، فأخذ في تدريب منير على أداء ألحانه وألحان غيره النوبية، ثم بدآ في الاستعانة بكلمات معارفهم من الشعراء عبد الرحيم منصور وفؤاد حداد.





الاحتراف

كانت البداية الحقيقية بانضمام الموسيقي هاني شنودة الذي أضاف للمجموعة كثيرا، بألحانه وتوزيعاته غربية الطابع، بل إنه جلب أعضاء فرقته الحديثة وقتها المصريين ليرددوا ويعزفوا أغاني الألبوم الأول الذي لم يصادفه النجاح. وتلا ذلك ألبوم من إنتاج نفس الشركة التي اقتنعت بتلك المجموعة، والتي أتى شنودة إليها بيحيى خليل وفرقته، فنجح الألبوم وتبعته نجاحات متتالية في ألبومات نتاج لتعاون كامل مع فرقة يحيى خليل وملحنين و كتاب شباب وكبار، وتنوعت التجارب وأثراها اتجاه منير للدراما، وإشراك فرق غربية أيضا، والغناء بلهجات شامية وسودانية وجزائرية في خضم ما عرف بموسيقى الجيل وخلطها بين القوالب.





السمات الفنية

عرف منير بأدائه التلقائي والخارج عن آداب الأداء المعروفة للمصريين، فلم يشاهد في بدلة أو ثابتا أمام الميكروفون، و حركاته العصبية، ولهجته الهجين بين القاهرية والأسوانية، كما أن ارتباطه بأشعار الصف الأول من شعراء العامية المصرية و قواميسهم المغايرة الخالية من النبرة الرومانتيكية التي سادت منذ أواخر القرن التاسع عشر وموسيقاه المنفصلة عن الطرب الكلاسيكي ، جعل الكثيرين ينكرونه ولكنه في المقابل أعجب الشباب بل وجمهور المهرجانات، وأطلق عليه محبوه في مصر "الملك" تيمنا باسم ألبومه السياسي الشهير. وقد استطاع منير أن يحطم في التسعينيات صورته كمغن للمثقفين، وصار من المألوف أن تسمعه في الشارع





ألبومات

علموني عنيكي 1977
بنتولد 1978
شبابيك 1981
اتكلمي 1983
بريء 1986
الملك هو الكاشف 1986
وسط الدايرة 1987 محمد وردى
مقدرش 1988
شوكولاتة 1989
يا اسكندرية 1990
مشوار 1991 (إعادة توزيع لأعمال من الخمسة ألبومات الأولى)
الطول واللون والحرية 1992
افتح قلبك 1994
ممكن 1995
من أول لمسة 1996
المصير 1997 (و يحتوي على أغنيتي فيلم المصير إخراج يوسف شاهين، والذي أدى فيه منير دور مغن أندلسي)
حبيبتي 1998 (أغاني مسلسل "جمهوري زفتى")
الفرحة 1999
في عشق البنات 2000
أنا قلبي مساكن شعبية 2001
الأرض..السلام 2002 (يعرف أيضا بـ "مدد")
أحمر شفايف 2003
إمبارح كان عمري عشرين 2005






أفلام

حدوتة مصرية 1982
اليوم السادس 1986
الطوق والإسورة 1987
يوم حلو ويوم مر 1988
حكايات الغريب 1992
ليه يا هرم
البحث عن توت عنخ آمون
شباب على كف عفريت
اشتباه
المصير 1997
حكايات الغريب (عن قصة قصيرة لجمال الغيطانى والمعالجة الدرامية والسيناريو والحوار لمحمد حلمي هلال الإخراج لإنعام محمد علي




مسلسلات

جمهورية زفتى 1999
علي عليوة






مسرحيات

الملك هو الملك
ملك الشحاتين
مساء الخير يا مصر



صعيدى بيغنى هيب هوب !!

والله لغاية دلوقتى ما قادر ابطل ضحك و عمال اعيد فى الفيديو هههههههههههههههههههههههه


هل انت فى مشكلة فعلا ام وهم ؟


طبعا من عنوان الموضوع و كل واحد خد موقف من كلامى
نفكر بهدوء ....ايه المشكله الكبيرة اللى احنا فيها ؟

نبدأ بسؤال مهم :

ايه الهدف اللى احنا عايشين ليه ؟
ربنا خلقنا ليه؟؟
طبعا عشان نعبده
(وما خلقنا الانس والجن الا ليعبدون)

احنا الاول بنعبد الله حق عبادته عشان ربنا يوفقنا ويساعدنا ..

هل الاصل فى الحياة ان كل البشر يعيشوا حياه سهله بدون اى مشاكل(ابتلاءات)؟؟
لاء طبعا , يبتلى المرء على قدر ايمانه واكتر بنى ادم ابتلائا الانبياء

هل السعاده الحقيقية هى اننا نحقق كل ما نحلم به ونلبى كل احتياجتنا ؟
لاء طبعا , السعاده الحقيقية هى الرضى بالرزق وراحه الضمير


ما هى اهم هدف للانسان ؟
طبعا , ان يعمل صالحا وانا يعبد الله حتى يدخل الجنة

الطموح شىء مهم وجميل فى حياتنا

اعمل لدنياك كانك تعيش ابدا ..... و اعمل لاخرتك كأنك تموت غدا

لكن

هل الاصل فى الحياة ان يعيش الانسان فى سعادة تامة ؟
هل الاصل ان نعيش جميعا بدون مشاكل؟
هل الاصل ان نصبح جميعا اغنياء؟
سيد الخلق اجمعين سيدنا محمد (صلى الله عليه وسلم) كان فقيرا
الصحابه كانو يمرون بظروف اقسى منا بكثير
كلنا عارفين قصص الانبياء كويس وعرفنا كلهم مروا بايه وضحوا بايه

ايه بقى مشكلتنا ؟؟

ليه كلنا بنفكر اننا نعمل بوظيفة مرموقة و بمرتب كبير وزوجة صالحة وشقة جميلة وعربية و......؟
ده اكيد طموح جميل بس لو محققناش الطموح ده مش معناه ان الدنيا اتهديت لا اودامك فرصة و اتنين و تلاتة و لازم تسعى و تفكر عشان توصل للى انت عاوزه ..
عادى, ممكن نعيش فى ظروف صعبة طول حياتنا وممكن تكون حياتنا عادية
لازم نفكر فى كل الاحتمالات دى

بص لحال باقى الدول الاسلاميه وانت تعرف انك فى نعمة كبيرة نحمد الله عليها

انا اسف صدعتكوا كفايه كلام لاننا لو فتحنا فى الكلام مش هنخلص ولو بعد سنة

السؤال الصحيح : احنا مشكلتنا الحقيقية ايه؟؟؟؟؟؟؟؟؟

مستنى اَرائكم




انتظرونا



عزيز القارئ بصبح عليك هههههههههههه

سمعنى احلى سلام للشباب المدونين قبل اى حاجة يا جددددددددددددع ..

اننظروا مدونتى ان شاء الله قريب جدا

و همتكوا معانا انتو بس و ان شاء الله تبقى مدونة حلوة :D

المدونة بأذن الله هتبقى شاملة مواقف حصلت لى قضايا اجتماعية و مش هننسى طبعا التهييس :D